अत्तरिया, सुदूरपश्चिम विश्वविद्यालय अन्तर्गत दुर्गालक्ष्मी बहुमुखी क्याम्पसको स्वतन्त्र विद्यार्थी युनियन (स्ववियु) निर्वाचन विवाद थप जटिल बन्दै गएको छ। समानुपातिक उम्मेदवारी दर्तासम्बन्धी दाबी विरोध टुंगोमा नपुग्दा निर्वाचन प्रक्रिया नै अन्योलमा परेको हो।
सोमबार परेको समानुपातिक उम्मेदवारीमा संयुक्त अखिलले प्रक्रिया मिचेको भन्दै नेपाल विद्यार्थी संघ (नेविसंघ) ले दाबी विरोधको निवेदन दर्ता गराएको थियो। नेविसंघले संगठन दर्ता नभएको संयुक्त अखिलबाट उम्मेदवारी दर्ता गर्नु अवैध भएको दाबी गर्दै खारेजीको माग राखेको छ। यता, संयुक्त अखिलले भने पाँच विद्यार्थी संगठनको एकताबाट बनेको संरचनाअन्तर्गत कानुनी प्रक्रिया पूरा गरी उम्मेदवारी दर्ता गरेको दाबी गरेको छ।
यस विषयमा मंगलबार र बुधबार लगातार छलफल भए पनि कुनै निष्कर्ष ननिस्किँदा निर्वाचन कार्यतालिका प्रभावित भएको छ। निर्वाचन अधिकृत लोकबहादुर महराका अनुसार विवाद समाधानका लागि छलफल जारी रहे पनि सहमति हुन नसकेको हो। मंगलबार नै दाबी विरोधपछि उम्मेदवारी नामावली प्रकाशन गर्ने कार्यतालिका रहे पनि विवादकै कारण बुधबारसम्म पनि उक्त प्रक्रिया अघि बढ्न सकेको छैन।
संयुक्त अखिलका सभापतिका उम्मेदवार बमबहादुर विकले नेविसंघले चुनाव हार्ने डरले नै अवरोध सिर्जना गरेको आरोप लगाए। उनले भने, “व्यक्ति विशेषलाई लिएर दाबी विरोध गर्नु पर्नेमा संगठन विरुद्ध नै विवाद सिर्जना गर्नुको कुनै औचित्य नै छैन। क्याम्पस प्रशासनसमेत चुनाव नहुने पक्षमा उभिएको देख्दा हिनताबोध भएको समेत उहाँले बताउनुभएको थियो। । यसरी विद्यार्थीको हक-अधिकारमाथि प्रहार गर्नु गलत हो। हाम्रो माग छ – यथाशीघ्र निर्वाचन सुचारु भएर सम्पन्न होस्।”भने हाे ।
यसबीच, दुवै पक्ष आ-आफ्नो अडानमा कायम रहेका कारण निर्वाचन प्रभावित हुने जोखिम बढेको छ। निर्वाचन अधिकृतको कार्यालयले छलफल जारी राखे पनि विवाद समाधानको टुंगो नलाग्दा स्ववियु निर्वाचन अन्योलग्रस्त बन्दै गएको छ।
