अत्तरिया, कैलालीकाे गोदावरी नगरपालिकाको समग्र विकासलाई गति दिनका लागि पछिल्ला तीन वर्ष नगर प्रमुख वीरेन्द्र भट्टको नेतृत्वमा भौतिक पूर्वाधार, शिक्षा, स्वास्थ्य, खानेपानीजस्ता आधारभूत सेवामा उल्लेखनीय प्रगति देखिएको छ। समावेशी र जनमुखी दृष्टिकोणसहित नगरपालिकाले सेवा प्रवाहलाई दुर्गम गाउँका नागरिकको घरआँगनसम्म पुर्याउने प्रयासलाई पहिलो प्राथमिकतामा राखेको छ।
गोदावरी नगर क्षेत्र विकासको दृष्टिले अझै क्रमिक यात्रामा छ। तर तीन वर्षको अवधिमा नगरपालिकाले गरेका कार्यहरू जनअपेक्षा र आवश्यकता केन्द्रित देखिन्छन्। नगर प्रमुख भट्टको नेतृत्वमा दुर्गम वस्ती- सलि,सल्लीचाप, सिम फुलबस्तीजस्ता ठाउँहरूमा अहिलेसम्म अँध्यारोमा बसेका घरमा पहिलोपटक बिजुलीको उज्यालो पुगेको छ। “सडकमा बत्ती भन्दा पहिला गरिब जनताको घरमा बत्ती बाल्नुपर्छ” भन्ने संकल्पका साथ उनले गाउँ केन्द्रित योजनाहरूलाई प्राथमिकता दिएका छन्।
धनगढी उपमहानगरपालिका र गोदावरी नगरपालिकाको तुलनामा अनेक बहस भइरहे पनि दुबैको भौगोलिक, आर्थिक र संरचनात्मक पृष्ठभूमि फरक छ। धनगढी, एक सुदूरपश्चिमको सदरमुकाम सहरका रूपमा दशकौँदेखि विकासको गतिमा अगाडि बढेको छ, जबकी गोदावरी क्षेत्रमा समुदायहरूको आशा, भरोसा र भविष्य निर्माण गर्ने नगरको पहिलो दायित्व हाे।
नगरपालिकाको नीति निर्माण र कार्यान्वयनका मेरुदण्डहरू जनमुखी र निष्पक्ष हुने हो भने विकास आफैं गतिशील हुन्छ भन्ने सिद्धान्तमा नगरप्रमुख भट्ट दृढ छन्। सडकबत्तीभन्दा पहिला दुर्गम गाउँमा उज्यालो पुर्याउने, खानेपानी पुर्याउने, आधारभूत सेवा प्रवाह सुनिश्चित गर्ने उनको दृष्टिकोणले स्थानीय तहमा विकासको चरित्र नै परिभाषित गर्न थालेको छ।
“सडकमा बत्ती बलेन भनेर नाराबाजी सुन्छु, तर कसैले जनताको घरमा बत्ती बलेको छैन भनेर कहिल्यै नाराबाजी गरेको छैन,” नगर प्रमुख भट्ट भन्छन्, “त्यही भएर मेरो पहिलो सेवा गरिबको घरबाट सुरु हुन्छ।”
यस्तो कार्यशैलीले गोदावरी नगरपालिकालाई जनउत्तरदायी र व्यवहारिक बनाउँदै लगेको छ। विकास अब केवल सडक र संरचनामा सीमित छैन, यो जनताको जीवनशैली र सोचमा परिवर्तन ल्याउने दिशामा अघि बढिरहेको छ। गाउँ उज्यालो भयो भने सहर आफैं उज्यालो हुन्छ भन्ने विश्वाससहित गाउँमै विकासको ज्योति फैलाउने कार्य गोदावरी नगरपालिकाले जारी राखेको छ। यही हो जनप्रतिनिधिको पहिलो सफल पाइला-जनताको झुपडीसम्म पुगेर सेवा पुर्याउनु।
