अत्तरिया,कैलालीको गोदावरी नगरपालिकामा सक्रिय झण्डै ४१ भन्दा बढी सहकारी संस्थाहरूले स्थानीय समुदायलाई आर्थिक सहयोग र सेवाहरू प्रदान गर्दै आइरहेका छन्। सहकारीका वार्षिक साधारण सभाहरूमा सेयर सदस्य र बचतकर्ताहरूको उल्लेख्य उपस्थिति देखिए पनि, उनीहरूको ध्यान संस्थाको उत्तरदायित्व र कार्यप्रति भन्दा भत्तामा केन्द्रित भइरहेको पाइएको छ।
साधारण सभा जस्तो महत्त्वपूर्ण अवसरमा सहकारीका पदाधिकारीहरूले प्रतिवेदनहरू प्रस्तुत गर्ने, नीति र योजनाबारे छलफल गर्ने, र सुधारात्मक कदमहरूको चर्चा हुने अपेक्षा गरिन्छ। तर, अधिकांश सभाहरूमा सेयर सदस्यहरू केवल भत्ता बुझ्नका लागि सहभागी भएको पाइन्छ। उनीहरूले संस्थाको गतिविधि, आर्थिक अवस्था, र समस्या समाधानका उपायहरूबारे चासो नदेखाउँदा सहकारीको पारदर्शिता र जवाफदेहितामा कमी देखिएको पाइन्छ।
साधारण सभाहरूमा सेयर सदस्यहरूले आफ्नो धारणा राख्ने र सुझाव दिनुपर्ने अवसर भए पनि, अधिकांश सभाहलमा यो प्रक्रिया निष्क्रिय देखिन्छ। पदाधिकारीहरूका प्रतिवेदन “पास भयो” भन्ने औपचारिक घोषणासँगै हलमा तालीको आवाज मात्र सुनिन्छ। यस्तो परिपाटीले सहकारीभित्रको व्यवस्थापन र पारदर्शितालाई कमजोर बनाइरहेको हो कि भन्ने प्रसन्न सबैमा उड्नु स्वभाविक नै हो। तर शेर सदस्यहरूले कुनै न कुनै विषयमा त वार्षिक साधारण सभामा चर्चा गर्नुपर्ने हो त्यो कुनै पनि सभाहरुमा देखिँदैन।
सहकारीको प्रमुख उद्देश्य सदस्यहरूको आर्थिक उन्नति र सामूहिक हित हो। तर, सेयर सदस्यहरूले संस्थाको नीतिगत निर्णय, वित्तीय योजना, र समस्याबारे आवाज नउठाउँदा सहकारीको गुणस्तर खस्किन सक्छ। भत्तामुखी प्रवृत्तिले सदस्यहरूलाई अल्पकालीन लाभमा मात्र सीमित राख्छ,।
जसले सहकारीको दीर्घकालीन अस्तित्व र प्रभावकारितामा संकट ल्याउँछ। यसका लागि सबै सहकारीका पदाधिकारी र कर्मचारीहरुले विशेषगरी सेयर सदस्य बचतकर्ताहरूलाई संस्थाको वार्षिक साधारणसभामा आइसकेपछि प्रतिवेदन वा आर्थिक प्रतिवेदन प्रस्तुतपछि भनाइहरू राख्नुपर्छ भन्ने खालका कार्यक्रमहरू बचत र सेयरकर्ताहरूलाई दिनुपर्ने र वार्षिक साधारणसभामा अन्तिमसम्म पनि संस्थाका प्रतिवेदनहरू प्रस्तुत भएको हुन्छन्। सबै कुरा सुन्नुपर्छ है भन्ने सुझाव सल्लाह दिनुपर्ने बेला आएको समेत देखिन्छ ।
सदस्यहरूको सक्रियता, सहकारीका नीतिगत सुधार, र संस्थागत पारदर्शिताको संयोजनबाट मात्र यी समस्याहरूको समाधान हुन सक्छ। साधारण सभा जस्तो महत्त्वपूर्ण प्रक्रियामा सेयर सदस्यहरूको सार्थक सहभागिताले मात्र सहकारीहरूलाई दीर्घकालीन रूपमा सफल बनाउन सक्छ। सम्पादकीय विचार !
