अत्तरिया, स्थानीय विकास, सामाजिक सचेतना र सुशासन प्रवर्द्धनमा निरन्तर अग्रणी भूमिका निर्वाह गर्दै आएका गोदावरी नगरपालिका–१० का वडाध्यक्ष रविन्द्र शाही गुड्डुको अगुवाइमा शुक्रबार एक विशेष अभिमुखीकरण कार्यक्रम सम्पन्न भएको छ।
जानकी माध्यमिक विद्यालयको प्राङ्गणमा आयोजित कार्यक्रम “सुरक्षा र सरसफाइ: शहरी जीवनशैलीको मेरुदण्ड” भन्ने नाराका साथ सम्पन्न भएको थियो। कार्यक्रमले विशेषतः ट्राफिक नियम तथा फोहोरमैला व्यवस्थापनसम्बन्धी व्यवहारिक चेतना फैलाउने उद्देश्य राखेको थियो।
कार्यक्रममा क्षेत्रीय ट्राफिक प्रहरी कार्यालय अत्तरिया, गोदावरी फोहोरमैला व्यवस्थापन समिति तथा विद्यालय प्रशासनको संयुक्त सहकार्य रहेको थियो। सयौंको संख्यामा सहभागी विद्यार्थी, शिक्षक, अभिभावक, स्थानीय अगुवा र सरोकारवालाहरूको उल्लेखनीय उपस्थिति रहेको कार्यक्रमले स्थानीयस्तरमै चेतनामूलक अभ्यासको सफल नमुना प्रस्तुत गरेको छ।
कार्यक्रमका प्रमुख आकर्षणहरूमा ट्राफिक जनचेतनामूलक झाँकी प्रदर्शन, विद्यार्थीहरूद्वारा तयार पारिएका पोस्टरहरूको प्रदर्शनी, फोहोर वर्गीकरणको व्यवहारिक अभ्यास तथा सहभागी विद्यार्थीलाई प्रशंसा–पत्र वितरण समावेश थिए।
वडाध्यक्ष गुड्डुले भन्नुभयो, “सुरक्षा र सरसफाइ सँगसँगै जानुपर्ने अभिन्न पक्षहरू हुन्। ट्राफिक नियमको पालना गर्नु जीवन रक्षाको माध्यम हो भने, फोहोरमैला व्यवस्थापनले समाज र वातावरणलाई स्वस्थ राख्छ।” उनले अभिभावकहरूलाई आफ्ना सन्तानलाई प्रारम्भिक तहबाटै सडक सुरक्षा र सरसफाइसम्बन्धी शिक्षा दिन आग्रह गरे।
कार्यक्रममा ट्राफिक प्रहरीका प्रतिनिधिहरूले विद्यार्थीहरूसँग प्रत्यक्ष संवाद गर्दै सडकमा लापरवाही गर्दा उत्पन्न हुने दुर्घटनाहरूका उदाहरण प्रस्तुत गरे। त्यसैगरी, फोहोरमैला व्यवस्थापन समितिका प्राविधिकहरूले प्लास्टिकजन्य तथा गैरविघटनशील फोहोरको दीर्घकालीन असरबारे प्रस्ट जानकारी दिए।
विद्यालयका प्रधानाध्यापकले धन्यवाद ज्ञापन गर्दै भने, “शिक्षाको उद्देश्य केवल किताबी ज्ञानमा सीमित रहनु हुँदैन। यस्ता कार्यक्रमले विद्यार्थीहरूमा व्यवहारिक जीवनशैलीको चेतना भरिदिन्छ, जुन दीर्घकालीन रूपमा प्रभावकारी हुन्छ।”
वडाध्यक्ष गुड्डुले समापन मन्तव्यमा भने, “स्थानीय तहको विकासमा जनसहभागिता अपरिहार्य छ। आगामी दिनमा यसभन्दा अझ व्यापक र व्यवहारमुखी कार्यक्रमहरू सञ्चालन गरिनेछ, जसले नागरिक स्तरमै सकारात्मक सोच र अभ्यासको विकास गर्न सघाउनेछ।”
उनको यो प्रयासले गोदावरी नगरपालिका–१० मात्र नभई समग्र कैलाली जिल्लाका अन्य वडाहरूका लागि पनि अनुकरणीय उदाहरण पेश गरेको सहभागीहरूले बताएका छन्।
स्थानीय स्तरमै जनजागरण, सचेतना र नागरिक जिम्मेवारीका विषयमा यसरी कार्यक्रम आयोजना गर्नुले समग्र सामाजिक रूपान्तरणको संकेत दिएको सहभागी अभिभावक लक्ष्मण भट्टले प्रतिक्रिया दिएका थिए ।
