अत्तरिया, कैलालीको अत्तरियामा अवस्थित दुर्गालक्ष्मी नमूना माध्यमिक विद्यालयमा सुदूरपश्चिम विश्वविद्यालयको आंगिक क्याम्पस अन्तर्गत स्वतन्त्र विद्यार्थी युनियन (स्ववियु) को मतदान सम्पन्न भएको छ।
निर्वाचन समितिका अनुसार, बिहान ८ बजेदेखि सुरु भएको मतदान प्रक्रिया साँझ ४ बजे सम्पन्न भएको हो। कूल १,१२८ जना मतदाता रहेकोमा ८३१ जना विद्यार्थीले आफ्नो मताधिकार प्रयोग गरेका छन्।
स्ववियु निर्वाचनका लागि दुई प्रमुख प्यानलले उम्मेदवारी दिएका छन्। संगठनको गठबन्धनमा बनेको संयुक्त अखिल प्यानलबाट अखिल क्रान्तिकारीका बम बहादुर विकले सभापतिमा उम्मेदवारी दिएका छन्। त्यस्तै, नेपाल विद्यार्थी संघ (नेविसंघ) तर्फबाट भुवन महराले सभापतिका लागि प्यानलसहित उम्मेदवारी दिएका छन्।
दुर्गालक्ष्मी बहुमुखी क्याम्पसमा सञ्चालन भएको मतदान शान्तिपूर्ण ढंगले सम्पन्न भएको निर्वाचन समितिले जनाएको छ। अब मतगणनाको तयारी भइरहेको छ र छिट्टै परिणाम सार्वजनिक गरिने अपेक्षा गरिएको छ।
यस निर्वाचनप्रति विद्यार्थीहरूको उत्साहपूर्ण सहभागिता रहेको छ भने स्ववियुको नेतृत्वमा को आउने भन्नेबारे क्याम्पसमा चासो बढेको छ।
