अत्तरिया,इन्डियन प्रिमियर लिग (आईपीएल) २०२५ को उद्घाटन खेलमा रोयल च्यालेन्जर्स बैंगलोरले विजयी सुरुवात गरेको छ। शनिबार इडन गार्डेन्समा सम्पन्न खेलमा बैंगलोरले कोलकाता नाइट राइडर्सलाई ७ विकेटले पराजित गर्दै सिजनको पहिलो खेल आफ्नो पक्षमा पारेको हो।
पहिले ब्याटिङ गरेको कोलकाताले निर्धारित २० ओभरमा ८ विकेट गुमाउँदै १७४ रन बनाएको थियो। जवाफमा बैंगलोरले मात्र १६.२ ओभरमा ३ विकेट गुमाउँदै लक्ष्य पूरा गर्यो।
बैंगलोरको जितमा विराट कोहलीले नटआउट रहँदै सर्वाधिक ५९ रनको योगदान दिए। उनले ३६ बल खेल्दै ४ चौका र ३ छक्का प्रहार गरे। ओपनर फिल साल्टसँग मिलेर पहिलो विकेटका लागि ९५ रनको सशक्त साझेदारी गरे। साल्टले ३१ बलमा ९ चौका र २ छक्का सहित ५६ रनको योगदान दिएका थिए।
कप्तान रजत पाटीदारले पनि आक्रामक खेल प्रस्तुत गर्दै १६ बलमा ५ चौका र १ छक्कासहित ३४ रन बनाए। देवदत्त पडीकल १० रनमा आउट भए भने लियम लिभिङ्गस्टोन ५ बलमा १५ रन बनाउँदै नटआउट रहे।
कोलकाताका लागि वैभव अरोरा, वरुण चक्रवर्ती र सुनिल नारायणले समान १-१ विकेट लिए।
त्यसअघि टस हारेर पहिले ब्याटिङमा उत्रिएको कोलकाताले आक्रमक सुरुवात गरे पनि लगातार विकेट गुमाउँदै निर्धारित ओभरमा ८ विकेटको क्षतिमा १७४ रन बनाएको थियो। अबको खेलमा दुवै टोलीले आ-आफ्नो कमजोरी सुधार गर्दै थप प्रतिस्पर्धात्मक प्रदर्शन गर्ने अपेक्षा गरिएको छ।
