प्रधानमन्त्री समेत रहेका नेकपा एमालेका अध्यक्ष केपी शर्मा ओलीले आफ्नो पार्टीभित्र कुनै गुटबन्दी स्वीकार्य नभएको बताएका छन्।
‘स्थिर रहने, कायम रहने पार्टीहरूले गुटबन्दी गर्दैनन्। गुटबन्दी हुँदैन त्यहाँभित्र। गुटबन्दी सहँदैनन्। पार्टी ओरालो लाग्नु छ भने गुटबन्दीको बाटो समाउँछ पार्टीले। पार्टीले गुटबन्दी समयमा नियन्त्रण गरेर पार्टीलाई एउटा पार्टीको रूपमा अगाडि बढाएन भने विभाजित हुन्छ,’ उनले भने।
आइतबार पार्टी केन्द्रीय कार्यालय च्यासलमा मनोनीत उपाध्यक्षसहितका केन्द्रीय सदस्यहरूलाई सपथ गराउने क्रममा उनले यस्तो बताएका हुन्।
‘हाम्रो पार्टीमा कुनै गुटबन्दी स्वीकार्य छैन। कतिपयले प्रजातन्त्रका लागि झगडा हुनुपर्छ पनि भन्छन्, हाम्रोमा त्यस्तो हुँदैन,’ ओलीले भने।
साथै, उनले गुटबन्दीको विषयलाई गम्भीर भएर मनन गर्न पनि कार्यकर्तालाई निर्देशन दिए।
‘यस्तो कुरा कति सुनिया सुनियो भन्नुहोला, यो सुनेर उडाउने कुरा होइन। मनन गर्ने कुरा हो,’ उनले भने।
