धनगढी, कैलालीको गोदावरी नगरपालिकाको प्रशासकीय भवनको पहिलो पटक उद्घाटन २०७८ चैत्र १४ गते भयो । नेकपा एमालेबाट निर्वाचित तत्कालीन नगर प्रमुख हरिसिंह साउँदले सो भवनको उद्घाटन गरेका थिए ।
पुरानो शिलालेखमा लेखिएको छ, ‘मिति २०७८ चैत्र १४ गते सोमबारका दिन गोदावरी नगरपालिकाको कार्यालय, कैलालीको प्रशासनिक भवनको समुद्घाटन नगरप्रमुख श्री हरिसिंह साउँद ज्यूद्वारा सु–सम्पन्न गरियो ।’
तर बिहीबार सो भवनको शिलालेख भने फेरिएको छ । नेपाली कांग्रेसबाट निर्वाचित नगर प्रमुख वीरेन्द्र भट्टले पुरानो शिलालेख फालेर आफ्नो नामको शिलालेख टाँस्दै भवनको दोस्रो पटक उद्घाटन गरेका छन् । उनले बिहीबार एक कार्यक्रमका बिच भवनको उद्घाटन गरेका हुन् ।
यसैबिच नगर प्रमुख भुट्को कडा विरोध भइरहेको छ । नामको राजनीति गरेको भन्दै यहाँको प्रमुख प्रतिपक्ष दल नेकपा एमालेले मात्रै होइन सर्वसाधारणले समेत विरोध जनाइरहेका छन् ।
विरोधमा एमालेले नगरपालिका घेराउ समेत गरेको थियो । सो भवन एसियाली विकास बैंकको ऋण सहयोगमा नेपाल सरकारको क्षेत्रीय सहरी विकास आयोजना मार्फत निर्माण भएको थियो ।
