अत्तरिया, सुदूरपश्चिम विश्वविद्यालय अन्तर्गत अत्तरियामा रहेको दुर्गालक्ष्मी बहुमुखी क्याम्पसमा यही चैत्र २७ गते स्वतन्त्र विद्यार्थी युनियन (स्ववियु) निर्वाचन हुँदैछ। निर्वाचनको सन्दर्भमा क्याम्पसमा विद्यार्थी नेताहरू सक्रिय देखिएका छन् भने प्राध्यापकहरूसँग सुशासन र प्रशासनसम्बन्धी छलफल समेत भइरहेको छ।
क्याम्पसमा पुगेर विद्यार्थी नेताहरूले सुशासन, विद्यार्थी हक अधिकार र क्याम्पस सुधारका मुद्दालाई उठाउँदै आएका छन्। कक्षा कोठाहरूमा समेत गएर उनीहरूले शिक्षाको गुणस्तर र क्याम्पसको वातावरण सुधार गर्नुपर्ने धारणा राखेका छन्। यस्तै, प्राध्यापकहरूले पनि विद्यार्थीहरूको उत्साह, मर्यादित व्यवहार र चुनावप्रतिको जिम्मेवारीबोधको खुलेर प्रशंसा गरिरहेका छन्।
तर क्याम्पसको वास्तविक अवस्था भने नेताहरूका भाषण जत्तिकै उज्यालो छैन। कक्षा कोठा भित्र पस्दा देखिएको दुर्गन्ध र सरसफाइको चरम अभावले चुनावी माहोलमा उठाइएका सुशासनका नाराहरूको औचित्यमाथि प्रश्न उठाएको छ। दुर्गन्धित कक्षा कोठा, फोहोरको थुप्रो र अव्यवस्थित वातावरणले क्याम्पस प्रशासन र नेतृत्वप्रतिको असन्तोष झल्काउँछ।
क्याम्पस भनेको केवल शिक्षा दिने थलो मात्र होइन, अनुशासन, शुद्ध वातावरण र सामाजिक उत्तरदायित्वको पाठ सिकाउने स्थल पनि हो। विद्यार्थी नेताहरूले घरदेखि क्याम्पससम्म सरसफाइ र सुशासनका कुरा गरे पनि व्यवहारमा ती कुरा लागू हुन सकेका छैनन्। क्याम्पसको अवस्थाले विद्यार्थी र टाईकोटले मात्रै अनुशासन देखाउँदैन, व्यवहारमै परिवर्तन आवश्यक हुन्छ भन्ने यथार्थ प्रकट भएको छ।
स्ववियु निर्वाचनले क्याम्पसमा नयाँ नेतृत्व दिनेछ, तर त्यो नेतृत्वले शिक्षाको मात्र होइन, वातावरण, व्यवस्थापन र सुशासनको पनि नेतृत्व गर्न सक्नेछ कि भन्ने आशा र चिन्ताको विषय बनेको छ। क्याम्पस स्वच्छ र अनुशासित भएपछि मात्रै उदाहरणीय बन्न सक्छ भन्ने सन्देश यसपटकको चुनावले दिन सक्छ कि सक्दैन, हेर्न बाँकी छ।
